म्यान्चेस्टर युनाइटेड एफए कपको सेमिफाइनलमा पुगेको छ।
ओल्ड ट्राफोर्डमा आइतबार राति सम्पन्न खेलमा घरेलु टोली युनाइटेडले लिभरपुलमाथि ४-३ गोल अन्तरको रोमाञ्चक जित हासिल गर्दै सेमिफाइनमा स्थान बनाएको हो।
युनाइटेडको जितमा स्कट म्याकटोमिनी, एन्टोनी, मार्कस रासफर्ड र अमद डियालोले गोल गरे। लिभरपुलका एलेक्सिस मक्यालिस्टर, मोहम्मद सलाह र हार्भे एलियटले गोल गरे।
खेलको १०औँ मिनेटमै युनाइटेडले स्कटको गोलमार्फत् अग्रता लिएको थियो। तर, पहिलो हाफ सकिँनै लाग्दा दुई गोल गर्दै लिभरपुलले खेलमा अग्रता बनायो।
४४औँ मिनेटमा मक्यालिस्टरले लिभरपुलका लागि गोल गरे। पहिलो हाफको थप गरिएको समयमा सलाहले गोल गर्दै लिभरपुललाई २-१ को अग्रता दिलाए।
तर, ८७औँ मिनेटमा एन्टोनीले गोल गर्दै युनाइटेडलाई खेलमा फर्काए। निर्धारित ९० मिनेटको खेल २-२ गोलको बराबरीमा सकिएको थियो। त्यसपछि खेल ३० मिनेटको अतिरिक्त समयमा धकेलिएको थियो।
१०५औँ मिनेटमा हार्भेले गोल गर्दै लिभरपुललाई पुन: अग्रता दिलाए। तर, त्यसको सात मिनेटपछि नै रासफर्डले गोल गर्दै युनाइटेडलाई खेलमा फर्काउदा स्कोर ३-३ मा पुग्यो।
८६औँ मिनेटमा मैदान छिरेका डियालोले अतिरिक्त समयको इन्ज्युरी समयमा गोल गर्दै युनाइटेडलाई ४-३ को जित दिलाए। गोल गरेको एक मिनेट बित्न नपाउँदै उनले रातो कार्ड पाएका थिए।
