धनगढी उपमहानगरपालिक-१६ स्थित श्री बेहडाबाबा माध्यमिक विद्यालयको ६३औं वार्षिकोत्सव तथा अभिभावक दिवस सम्पन्न भएको छ । विद्यालय व्यवस्थापन समितिका अध्यक्ष हरिनारायण राना थारूकाे अध्यक्षतामा सोमबार उक्त कार्यक्रम सम्पन्न भएको हो ।
कार्यक्रमका प्रमुख अतिथि धनगढी-१६ का ९८ वर्षीय ज्येष्ठ नागरिक कविराम थारू रहेका थिए भने विशिष्ट अतिथि धनगढी-१६ कै वडा अध्यक्ष रामलाल चौधरी रहेका थिए । यसै अवसरमा विद्यालयका पूर्व शिक्षकहरू दिपराज पाण्डेय, खडक नेपाली, गौरी प्रसाद जोशीलाई विद्यालयमा रहदा गरेको योगदानका आधारमा सम्मान समेत गरिएको थियो ।
कार्यक्रममा उत्कृष्ट अभिभावकका रूपमा अभिभावक जङ्ग बहादुर सेटी र दिपा साउदलाई विशेष सम्मान गरिएको थियो । विद्यालयमा कार्यरत मा.वि. गणित शिक्षक सुरेन्द्र बहादुर पाल, निमावि गणित/विज्ञान शिक्षक काशीमान थापामगर र प्रा वि. शिक्षक गणेश राज जोशीलाई जनही नगद रु २,०००/- ले सम्मान गरिएको थियो ।
कार्यक्रममा स्वागत मन्तव्य शिक्षक शेर बहादुर चन्दले राखेका थिए भने प्र.अ. भोजराज शर्माले १८ पृष्ठ लामो विद्यालय प्रतिवेदन प्रस्तुत गरेका थिए । कार्यक्रमको सन्चालन शिक्षक द्वय गणेश बहादुर धामी र हिक्मत बहादुर चौधरीले गरेका थिए । यसै अवसरमा विद्यार्थी कल्याणकाेष अक्षयकोष स्थापना गरी करिब ९०,०००/- रकम विद्यालयमा हस्तान्तरण भएको छ । कार्यक्रममा पुरस्कार वितरणका साथै विद्यार्थीहरूले विविध मौलिक सांस्कृतिक प्रस्तुतिहरु समेत प्रस्तुत गरेका थिए ।
