धनगढी, २२ असार । कैलाली जनपुस्तकालय धनगढीको आयोजनामा २११औं भानु जयन्तीको अवसरमा अन्तर विद्यालय (आधारभूत तह) स्तरीय कविता प्रतियोगिता (आज) सनिबार सम्पन्न भएको छ ।
कैलाली र कञ्चनपुर जिल्लाका २३ विद्यालयका २३ जनाको सहभागीता रहेको सो प्रतियोगितामा नन्दिनाज एकेडेमी धनगढीकी रिद्दिसा अधिकारी प्रथम, एक्सिस विद्याश्रम धनगढीका मिसन उपाध्याय द्वितीय र सैनिक आवासीय महाविद्यालय तेघरी कैलालीका विश्वास बोहरा तृतीय स्थान प्राप्त गर्न सफल भएका छन् । त्यस्तै डिलाइट इङ्गलिस बोर्डिङ्ग स्कुल धनगढी र त्रिभुवन मावि बोराडाँडी,धनगढीका जेनिसा जोशी र विवेचना अवस्थीने सान्त्वना स्थान प्राप्त गरेका छन् ।
कविता प्रतियोगिताका बिजेताहरूलाई २०८१ असार २९ गते भानुजयन्ती विशेष समारोहमा पुरस्कार तथा सम्मानपत्र वितरण गरिने कार्यक्रम संयोजक तथा साहित्यकार हर्क बोहराले बताए ।
धनगढी उपमहानगरपालिका-१ का वडाध्यक्ष सन्तोष मुडभरीको प्रमुख आतिथ्यमा सम्पन्न कार्यक्रममा थुप्रै साहित्यकार तथा संस्कृतिकर्मीहरूको उल्लेखनीय उपस्थिति रहेको थियो।
