धनगढी उपमहानगरपालिका भित्रका खाद्य पदार्थ विक्री वितरण गर्ने पसलमा सुर्ती तथा मदिराजन्य पदार्थ विक्रि वितरणमा रोक लगाउने उपमहानगरपालिकाको निर्णय कार्यान्वयन गर्न नगर प्रहरीले बजार अनुगमन शुरु गरेको छ ।
नगर प्रहरीले आज देखि सो निर्णय कार्यान्वयन गर्न बजार अनुगमन थालेको हो । अनुगमनका क्रममा नियम विपरित खाद्य पदार्थ विक्री गर्ने पसल,होटेल तथा ठेलामा सुर्ती जन्य पदार्थ भेटिएमा नियन्त्रणमा लिई उपमहानगरपालिकाको निर्णय कार्यान्वयन गर्न नगर प्रहरी एक्सनमा उत्रिएको हो ।
उपमहानगरपालिकाले गत पुष १७ गते एक सुचना जारी गर्दै माघ १ गतेदेखि धनगढी उपमहानगरपालिका भित्रका खाद्य पदार्थ विक्रि वितरण गर्ने पसलमा सुर्ती तथा मदिराजन्य पदार्थ विक्रीमा रोक लगाउने जनाएको थियो । नगर प्रहरीले पहिलो चरणमा खाद्य पदार्थ विक्री गर्ने किराना पसल,होटेल तथा होलसेल पसलहरुमा अनुगमन गरि भेटिएका सुर्तीजन्य पदार्थ नियन्त्रणमा लिई सम्झाइ बुझाई गर्ने गरि सन्देश मुलक अनुगमन गरेको जनाएको छ ।
आज धनगढीको ६ लेन सडक खण्डको मिलन चोकदेखि सहिद गेटसम्म गरिएको अनुगमनका क्रममा ठूलो परिमाणमा सुर्तीजन्य पदार्थ नियन्त्रणमा लिइएको नगर प्रहरीले जानकारी दिएको छ । किराना पसल,होलसेल पसल तथा होटेलबाट चुरोट, गुट्खा,सुर्ती लगायतका प्रतिबन्धित पदार्थ नियन्त्रणमा लिइएको नगर प्रहरीले जानकारी दिएको छ । पहिलो पटकको अनुगमनमा सामान नियन्त्रणमा लिने र व्यापारीलाई सम्झाउने तर अर्को पटकको अनुगमनमा भेटिएमा नियम अनुसार कारबाही गरिने जनाइएको छ ।
यस अघि उपमहानगरपालिकाले स्वास्थ्य सेवा ऐन, २०७७ को दफा ३० (१) मा सुर्ती तथा मदिराजन्य पदार्थ विकी वितरणको लागि उपमहानगरपालिकाबाट छुट्टै अनुमति लिनु पर्ने र सोही ऐनको दफा ३ को (२) मा खाद्य पदार्थ विक्री गर्ने पसलमा सुर्ती तथा मदिराजन्य पदार्थ विक्री वितरण गर्न बन्देज लगाइने उल्लेख भए बमोजिम माघ १ गते देखि चुरोट, बिँडी, सुर्ती, खैनी, तमाखु जस्ता अन्य सूर्तीजन्य पदार्थ विक्री गर्न प्रतिबन्ध लगाउने घोषणा गरेको थियो ।
