एसीसी वुमन्स प्रिमियर कप-२०२४ को पहिलो खेलमा नेपालले हङकङविरुद्ध ८ विकेटको जित निकालेको छ ।
मलेसियाको क्वालालाम्पुरस्थित सेलांगुर टर्फ क्लबमा जितका लागि हङकङले दिएको ९४ रनको लक्ष्य नेपालले दुई विकेट गुमाएर १४.१ ओभरमै भेटाएको हो ।
नेपालको जितका लागि कप्तान इन्दु बर्माले ४० रनको योगदान गरिन् । सीता रानामगरले ३६ रनमा अविजित रहिन् भने कविता कुँवरले ४ रन जोडिन् ।
बलिङतर्फ हङकङकी इक्रा सहर र चानका मन बेट्टीले १/१ विकेट लिए ।
यसअघि टस जितेर पहिले ब्याटिङ गरेको हङकलले ८ विकेट गुमाएर पूरै २० ओभर खेल्दै ९३ रन बनाएको थियो ।
हङकङकी कप्तान चान का यिंग क्यारीले सर्वाधिक २१ रन बनाइन् । मरियम बिबीले १९, यसमिन दसवानीले १५ र ओपनर नताशा माइल्सले ११ रन बनाइन् । अन्य ब्याटरले दोहोरो अंक जोड्न सकेनन् ।
नेपालकी रुविना क्षेत्र र कविता जोशीले समान २/२ विकेट लिए भने पुजा महतो र सीता रानामगरले १/१ विकेट लिए ।
१६ देशको सहभागिता रहेको प्रतियोगितामा समूह डी
मा नेपाल, हङकङ, भुटान र माल्दिभ्स रहेका छन् । हरेक समूहका शीर्ष दुई टोली क्वाटरफाइनलमा पुग्नेछन् ।
सेमिफाइनल हुँदै फाइनल खेल्ने दुई टोलीले यसै वर्ष हुने वुमन्स एसिया कप खेल्न पाउनेछन् । सेमिफाइनल पुग्ने चार टोलीले एसीसी इमर्जिङ टिम्स एसिया कप २०२५ खेल्न पाउनेछन् ।
