नेपालले वाफ वुमन्स च्याम्पियनसिप फुटबलमा शानदार जित निकालेको छ । बिहीबार भएको खेलमा सावित्रा भन्डारीले ५ गोल गरेपछि समूह चरणको दोस्रो खेलमा नेपालले इराकमाथि ५–० को प्रभावशाली जित निकालेको हो ।
इराकविरुद्ध नेपालकी फरवार्ड सावित्राले उत्कृष्ट प्रर्दशन गर्दै नेपालको जितका लागि ५ गोल गरिन् ।
नेपालले पहिलो खेलमा सिरियालाई ४–१ गोल अन्तरले हराएको थियो । सो खेलमा समेत सावित्राले एक गोल गरेकी थिईन् ।
खेलको १३ औं मिनेटमा सावित्राले नेपाललाई सुरुवाती अग्रता दिलाएकी थिईन् । त्यसको दुई मिनेटमै सावित्राले नेपालको अग्रता दोब्बर पारिन् । खेलको ३६ औं मिनेटमा सावित्राले ह्याट्रिक गरेकी थिईन् । पहिलो हाफ सकिन एक मिनेट अघि उनले नेपालका लागि चौथों गोल गरिन् ।
दोस्रो हाफमा नेपालले गोलका पर्याप्त अवसर सिर्जना गरेपनि सफल हुन सकेन । खेलको ८० औं मिनेटमा गोल गर्दै सावित्राले नेपाललाई ५–० को शानदार जित दिलाईन् ।
जीत सहित नेपाल सेमिफाइनल प्रवेशको नजिक पुगेको छ । समूह बीमा रहेको नेपालले ६ अंक जोडेको छ । प्यालेस्टाईनको ३ अंक छ । सिरिया र इराक अंक विहीन रहेकाछन् ।
