पोखरा थन्डर्सलाई टाइब्रेकरमा ४-३ हराउँदै धनगढी एफसी नेपाल सुपर लिग (एनएसएल) को फाइनलमा पुगेको छ ।
निर्धारित ९० र थप ३० मिनेटमा २-२ को बराबरीपछिको पेनाल्टीमामा धनगढीले बाजी मारेको हो । धनगढी पहिलो संस्करणमा पनि पहिलो क्वालिफायरबाटै फाइनल पुग्न सफल भएको थियो।
धनगढी एफसी दोस्रो संस्करणको एनएसएलको फाइनल प्रवेश गर्ने पहिलो टोली बनेको छ । लिग तालिकामा दोस्रो स्थानमा रहँदै धनगढीले क्वालिफायरमा पुगेको थियो । पोखरा थन्डर्स शीर्षस्थानमा रहँदै क्वालिफायरमा पुगेको थियो ।
२-१ ले पछि परेको खेलको थप समयको अन्तिम मिनेटमा अहमद हिजाजीले गोल गर्दै धनगढी खेलमा फर्किएको थियो।
पोखराका लागि आयुष घलान र स्टेफन अन्नोरले समान एक गोल गरे । धनगढीका लागि भने कप्तान देवेन्द्र तामाङ र हिजाजीले समान एक गोल गरेका थिए ।
धनगढीले अब शनिबार हुने फाइनल खेलमा उपाधिका लागि खेल्ने छ । पोखराले भने फाइनल प्रवेश गर्ने थप एक अवसर पाउने छ । पोखराले तेस्रो र चौथो भएका काठमाडौं रेजर्स र ललितपुर सिटी एफसी बीचको विजेता विरुद्ध फाइनल प्रवेशका लागि क्वालिफायर २ खेल्नेछ ।
काठमाडौं र ललितपुर बीचको खेल मंगलबार हुनेछ । क्वालिफायर २ बिहीबार हुने छ ।
निर्धारित ९० मिनेटको समयमा दुबै टोलीले १-१ को बराबरी खेलेपछि खेल ३० मिनेटको अतिरिक्त समयमा लम्बिएको थियो । अतिरिक्त समयमा पनि दुवै टोलीले एक एक गोल थपेपछि खेल पेनाल्टी सूटआउटमा गएको थियो।
