धनगढी,२१ फागुन । आईसीसी टी–२० विश्वकप क्रिकेटको दोस्रो सेमिफाइनलमा आज भारत र इङ्ग्ल्यान्ड खेल्दैछन् । खेल मुम्बईको वानखेडे स्टेडियममा बेलुकी सवा ७ बजे शुरू हुनेछ ।
टी–२० विश्वकपमा भारत र इङ्ग्ल्यान्डबीच लगातार तेस्रो पटक सेमिफाइनलमा प्रतिस्पर्धा हुन लागेको छ । सन् २०२२ मा इङ्ग्ल्यान्डले भारतलाई सेमिफाइनलमा हराएको थियो । त्यो वर्ष इङ्ग्ल्यान्डले फाइनलमा पाकिस्तानलाई हराएर उपाधि जितेको थियो ।
यस्तै २०२४ मा भारतले इङ्ग्ल्यान्डलाई सेमिफाइलनमा हराएको थियो । त्यो वर्ष भारतले फाइनलमा दक्षिण अफ्रिकालाई हराएर उपाधि जितेको थियो ।
टी–२० अन्तर्राष्ट्रिय क्रिकेटमा यी दुई टोलीबीच अहिलेसम्म २९ पटक भेट भएकोमा भारत १७ र इङ्ग्ल्यान्ड १२ खेलमा विजयी भएको छ । यस्तै टी–२० विश्वकपमा यी दुई टोलीबीच अहिलेसम्म ५ पटक भेट भएकोमा भारत ३ र इङ्ग्ल्यान्ड २ खेलमा विजयी भएको छ ।
‘सुपर–एट’मा भारत समूह एकको दोस्रो र इङ्ग्ल्यान्ड समूह दुईबाट शीर्ष स्थानमा रहेको सेमिफाइनलमा पुगेका हुन् ।
हिजो भएको पहिलो सेमिफाइनलमा दक्षिण अफ्रिकालाई ९ विकेटले हराउँदै न्युजिल्यान्ड फाइनलमा पुगेको छ । फाइनल खेल आउँदो आइतवार हुनेछ ।
प्रतिक्रिया
FaceBook Comment Plugins