कञ्चनपुरको पुनर्वासका जंगली वन्यजन्तु पिडीतहरुले मंगलबार सुदुरपश्चिम प्रदेशको उद्योग, पर्यटन, वन तथा वातावरण मन्त्रालयमा ज्ञापन पत्र बुझाएका छन् ।
खुल्ला सिमासंगै जोडिएको भारतीय दुधवा राष्ट्रिय निकुञ्जबाट आउने जंगली जनावरले बालिनाली, घर टहरा तथा ब्यक्तिको जिउधनमा समेत क्षति पुराउदै आएको छ । जंगली जनावरहरुको आक्रमणका कारण विगत वर्षमा ५ जनाको ज्यान गएको तथा सयौंको हाराहारीमा घाईते हुनुपरेको छ । विशेषगरी उक्त क्षेत्रबाट आउने हात्ती तथा अन्य जनावरहरुको कारण खेतीबाली नष्ट हुने गरेका र सयौं घरहरु भत्किएको दुधवा राष्ट्रिय निकुञ्ज बन्यजन्तु प्रभावित खाद्य अधिकार समुहका अध्यक्ष केशब प्रसाद तिमिल्सेनाले बताउनुभयो ।
बिचफाँटादेखि ख गाँउ सम्म करिव ५ किलोमिटर सो क्षेत्रमा विद्युतीय तारवार लगाइएको भएपनि त्यो अपुग रहेको दुधवा राष्ट्रिय निकुञ्ज बन्यजन्तु प्रभावित खाद्य अधिकार समुहका सल्लाहाकार सदस्य कुबेर नाथले जानकारी दिनुभयो ।
आर्थिक बर्ष २०७८/७९ मा विद्युतीय तारवारका लागि प्रदेस मन्त्रालयले २० लाख रकम बिनियोजन गरेको भए पनि नाम फरक परेकाले सो काम हुन नसकेको श्याम परियारले जानकारी दिनुभयो । त्यस्तै आर्थीक बर्ष २०७९/८० मा मन्त्रालयबाट पुर्नवास नगरपालिका वार्ड नं ८, ९ र १० मा मेसवायर तारवारका लागि दश लाख तथा वार्ड नं ९ विद्युतीय तारवारका लागि दश लाख बिनियोजन गरिएको भएपनी सो काम कार्यान्वयन हुन नसक्दा आफुहरु समस्या भोग्न बाध्य भएको उहाँले बताउनुभयो ।
बाँच्न पाउने तथा खान पाउने अधिकारसंग सम्बन्धित सो विषयलाई गम्भीरता पूर्वक लिई आफ्ना मागहरु सम्वोधन गर्न पहलका लागि मन्त्रालयका महाशाखा प्रमुख हेमराज विष्टलाई ज्ञापन पत्र बुझाउदै निम्न मागहरु गरेका छन् :
पिडीतका मागहरुः
१) पुनर्वास नगरपालिकाले तयार गरि सिफारिस साथ त्यस मन्त्रालयमा पेश गरिएको बिस्तृत लागत स्टिमेट अनुसार क्रमागत योजना अन्र्तगत राखी विद्युतीय तारवार कार्य सम्पन्न गरिदिन पहल गर्ने ।
२) वन्यजन्तुका कारण हुने क्षतिको आधारमा न्यायोचित क्षतिपूर्ति तथा घाईतेहरुको शिघ्र उपचारको ब्यवस्था हुने नीति तथा सो को कार्यान्वयनका लागि पहल गर्ने ।
पुनर्वासका जंगली बन्यजन्तु पिडीतहरुले बुझाएको ज्ञापन पत्र बुझ्दै महाशाखा प्रमुख हेमराज विष्टले बजेट विनियोजन भएर पनि काम हुन नसकेको कारण बुझ्ने बताउनुभयो । उहाँले अबको योजनामा यस विषयलाई आफुले प्राथमिकतामा राखेर काम गर्ने प्रतिबद्धता ब्यक्त गर्नुभयो ।
