काठमाडौं : नकल्ली नोट छाप्ने प्रिन्टर मसिनसहित एक युवक पक्राउ परेका छन् । प्रहरी प्रभाग कपनबाट खटिएको टोलीले आइतवार राति काठमाडौं महानगरपालिका- ६ महांकाल डेरा गरी बस्ने डोल्पाका २९ वर्षीय कर्मा गुरूङलाई पक्राउ गरेको हो ।
प्रभागका इन्स्पेक्टर नवराज सापोकोटाका अनुसार नक्कली नोट छाप्ने काम भइरहेको विशेष सूचना पाएपछि प्रहरीले गुरुङको डेरामा छापा मारेको थियो । प्रहरीले कोठाबाट एक हजार दरका २२६ थान नक्कली नोट, नक्कली नोट फोटोकपी तथा प्रिन्ट गर्ने मसिन १ थान, डिजिटल तराजु १ थान, साटिसकेको नगद २६ हजार ८०० रुपैयाँ, ल्यापटप र नोट छाप्न प्रयोग हुने मसिको बट्टा ४ थान बरामद गरेको हो ।
उनीमाथि थप अनुसन्धान तथा म्याद थपका लागि प्रहरी वृत्त बौद्ध पठाइएको इन्स्पेक्टर सापकोटाले बताए । “नक्कली नोट बजारमा गइसकेकाले कारोबार गर्दा सचेत रहन अनुरोध गरेका छौं,” सापकोटाले भने ।
